Грамадзянін Украіны Сяргей С., якога абвінавачваюць у падрыхтоўцы дыверсій у Польшчы на замову расійскіх службаў, асуджаны на восем гадоў пазбаўлення волі. 51-гадовы мужчына павінен быў атрымаць загад падпаліць некалькі будынкаў ва Уроцлаве.
51-гадовага грамадзяніна Украіны Сяргея С. затрымалі супрацоўнікі Агенцтва ўнутранай бяспекі ў студзені 2024 года. У расследаванні, якое вядзе Ніжнесілезскае аддзяленне Нацыянальнай пракуратуры ва Уроцлаве, на дадзены момант абвінавачанні выстаўленыя агулам пяці асобам.
С. абвінавачваўся ва ўдзеле ў арганізаванай злачыннай групе, якая займалася падрыхтоўкай і арганізацыяй дыверсій. Мужчыну таксама прад'явілі абвінавачанне ў падрыхтоўцы падпалу розных будынкаў ва Уроцлаве. Пасля затрымання Агенцтва ўнутранай бяспекі паведаміла, што С. дзейнічаў ад імя расійскіх службаў. Мужчына сваёй віны не прызнаў.
Восенню 2024 года пракуратура заявіла ў суд хадайніцтва аб асуджэнні С. без суда і пагадзілася з падазраваным, што ён добраахвотна падпарадкуецца пакаранню ў выглядзе трох гадоў пазбаўлення волі.
У кастрычніку 2024 года суд Уроцлава адхіліў гэтае хадайніцтва і пастанавіў правесці поўны суд над С. У заключным слове пракурор запатрабаваў для яго пяць гадоў пазбаўлення волі, а абарона — апраўдальнага прысуду.
Урэшце суд Уроцлава прызнаў Сяргея С. вінаватым і асудзіў на восем гадоў турмы.
ав