У сваёй вячэрняй прамове ў сацсетках прэзідэнт Украіны Уладзімір Зяленскі яшчэ раз падзякаваў тым, хто падтрымлівае яго краіну ў ваенным плане. Сёння адбылася чарговая сустрэча ў фармаце Рамштайн – сямнаццатая па ліку.
«Ёсць і новыя пакеты падтрымкі для Украіны, для нашых воінаў», – кажа прэзідэнт Уладзімір Зяленскі:
-Гэта снарады і ракеты, электронная зброя і беспілотнікі, новыя магчымасці нашай супрацьпаветранай абароны. Была створана Кааліцыя развіцця супрацьпаветранай абароны. Яе лідары – Германія і Францыя. Я ўдзячны за гэта кіраўніцтва. Я таксама ўдзячны кожнай краіне, якая ўдзельнічае ў гэтых намаганнях, якія дазваляюць нам лепш абараняць нашы гарады і сельскую мясцовасць ад расійскіх нападаў. Пакуль не пра ўсё можна казаць публічна, але ўкраінскі паветраны шчыт літаральна месяц ад месяца становіцца ўсё больш магутным.
Група Рамштайн была створана ў красавіку 2022 года на аднайменнай амерыканскай авіябазе ў Германіі. Гэта міжнародная пляцоўка супрацоўніцтва, якая збіраецца штомесяц для каардынацыі дапамогі Кіеву зброяй.
Прэзідэнт Уладзімір Зяленскі таксама заявіў, што экспартны калідор праз Чорнае мора працуе і дае выдатныя вынікі:
-Ужо перавезена амаль 5,5 мільёна тон грузаў. Афрыка, Азія, Еўропа – ад Іспаніі да Кітая. Я хачу падзякаваць усім, хто стаіць на варце бяспекі на Чорным моры і працуе ў нашых партах.
Прэзідэнт Украіны Уладзімір Зяленскі таксама паведаміў, што найбольш складаная сітуацыя на фронце цяпер у раёнах Бахмуту, Аўдзееўкі, Мар’інкі Данецкай вобласці і Купянска Харкаўскай вобласці.
ав