Віцэ-прэм'ер і кіраўнік Міністэрства нацыянальнай абароны Марыюш Блашчак удзельнічаў у сустрэчы міністраў абароны ЕС, якая адбылася ў Бруселі. Галоўнай тэмай сустрэчы стала сітуацыя з бяспекай у рэгіёне з асаблівым акцэнтам на падтрымку Украіны, а таксама супрацоўніцтва краін-членаў у нарошчванні ўласнай абароназдольнасці.
Падчас візіту ў Брусель адбылася двухбаковая сустрэча віцэ-прэм’ера Блашчака з міністрам абароны Нямеччыны Барысам Пісторыўсам.
«Мы размаўлялі з міністрам Пісторыўсам аб запуску хаба, які прызначаны для абслугоўвання танкаў «Леапард», якія ўжо ёсць ва Украіне. Наперадзе нас чакаюць пэўныя выклікі, але я ўпэўнены, што мы з імі справімся. Мы таксама гаварылі пра пашырэнне прысутнасці нямецкіх патрыётаў на польскай зямлі. І тут я таксама аптыміст», – адзначыў кіраўнік Мінабароны.
Віцэ-прэмʼер Марыюш Блашчак таксама спаслаўся на сваю размову з еўракамісарам Цьеры Брэтанам. «Я таксама размаўляў з камісарам Брэтанам пра вытворчасць боепрыпасаў на польскіх заводах, якія ўваходзяць у склад Polish Armaments Group. (…) Нас запэўнілі, што працэс будзе запушчаны ў вельмі кароткі час. Еўрапейская камісія мае адпаведныя сродкі, якія хоча накіраваць на інвестыцыі ў запуск і развіццё вытворчых магутнасцяў асобных заводаў. А польская абаронная прамысловасць зʼяўляецца адным з еўрапейскіх лідараў у вытворчасці боепрыпасаў», – паведаміў Блашчак.
Акрамя таго, падчас сустрэчы міністраў абароны ЕС адбылася сустрэча з генеральным сакратаром NATO Енсам Столтэнбергам, падчас якой абмяркоўваліся пытанні супрацоўніцтва ЕС і NATO ў сувязі з бягучай сітуацыяй бяспекі ў Еўропе.
biznesalert.pl / вх