Аляксандр Лукашэнка 18 сакавіка абмеркаваў з міністрам замежных спраў Максімам Рыжанковым крокі па аднаўленні даверу ў адносінах з партнёрамі, у тым ліку з шэрагам заходніх дзяржаў. Аб гэтым кіраўнік знешнепалітычнага ведамства расказаў журналістам па выніках рабочай сустрэчы з Лукашэнкам, перадае карэспандэнт БЕЛТА.
Аляксандр Лукашэнка ва ўступным слове абазначыў шэраг пытанняў для размовы. Гэта прапрацоўка візітаў, рэалізацыя планаў па развіццю супрацоўніцтва, у тым ліку з Кітаем. У ліку тэм таксама праца на пляцоўцы Еўразійскага эканамічнага саюза і падрыхтоўка да правядзення саміту з улікам старшынства Беларусі ў гэтым інтэграцыйным аб'яднанні ў бягучым годзе. Акрамя таго, Лукашэнка плануе правесці нараду з беларускімі пасламі.
«З кіраўніком дзяржавы таксама быў абмеркаваны шэраг пытанняў па рэалізацыі нейкіх нашых крокаў і крокаў нашых партнёраў па аднаўленні даверу ў адносінах. Гэта датычылася ў тым ліку і шэрага заходніх дзяржаў», - адзначыў Максім Рыжанкоў.
Якія менавіта пытанні абмяркоўваліся ў гэтым кантэксце, міністр не ўдакладніў. Аднак яшчэ напрыканцы мінулага года Лукашэнка, напрыклад, расказваў аб просьбах ЗША пашырыць дыпламатычную прысутнасць у Беларусі.
Белта/ав