Польская пара даследчыкаў распрацавала тэрмаўстойлівую фарбу з какававых зярнят. А дакладна - з насеннай лупіны какававых зярнят. Аўтары ўжо запатэнтавалі сваё вынаходніцтва, якое радыкальна павялічвае шанцы выратаваць людзей ад пажару.
Тэрмаўстойлівая фарба - справа рук навуковай пары - гэта Агнешка і Кшыштаф Кавальчык (Agnieszka i Krzysztof Kowalczykowie) з факультэта хімічнай тэхналогіі і інжынерыі Заходнепаморскага тэхналагічнага ўніверсітэта ў Шчэціне. Ідэя нарадзілася на кухні за кавай, успамінаюць даследчыкі.
— Усё пачалося з кавы. Паводле мяне, мая жонка п'е занадта многа кавы. І яна стала натхненнем. Я шукаў заменніка для кавы, расказаў Кшыштаф Кавальчык.
У выніку пошукаў атрымалася фарба, у якой адным з інгрэдыентаў з'яўляюцца адходы, то бок здробненая ў парашок насенная лупіна какавы.
Дзякуючы ім фарба набывае тэрмаўстойлівыя ўласцівасці. Афарбаваны прадмет награваецца павольней, што дае больш часу для эвакуацыі ў выпадку пажару.
— Крытычная тэмпература гэта 450 градусаў Цэльсія. У такіх умовах будынак абрынецца на працягу 5 хвілін. Калі пакладзём на яго слой фарбы, то гэты час падоўжыцца да 240 хвілін. Існуе меркаванне, што калі б на вежы Сусветнага гандлёвага цэнтра ў Нью-Ёрку нанеслі падобную фарбу, то вежы так хутка не абваліліся б.
Вогнеахоўны слой можна выкарыстоўваць у будаўніцтве, аўтамабільнай прамысловасці і ўсюды, дзе пастаўлена на карту абарона жыцця людзей.
IAR/яс