Цягам лютага праваабаронцы фіксавалі захаванне ўстойлівай тэндэнцыі пераследу грамадзян паводле палітычных матываў у крымінальным парадку. Прынамсі 156 чалавек былі асуджаныя за месяц у межах крымінальна-прававых рэпрэсій. З гэтай колькасці 114 складаюць мужчыны, 42 – жанчыны. Яшчэ пяцёра грамадзян былі рэпрэсаваныя ў межах спецыяльнай вытворчасці, паведамляе «Вясна».
Рэгіянальная структура пераследу ў лютым выглядала наступным чынам: Мінск – 74 чалавекі, Мінская вобласць – 26 чалавек, Гродзенская вобласць – 13 чалавек, Брэсцкая вобласць – 20 чалавек, Віцебская вобласць – 12 чалавек, Магілёўская вобласць – 6 чалавек і Гомельская вобласць – 5 чалавек.
У лютым адбыўся ўсплёск па колькасці сем'яў або групаў сваякоў, што трапляюць у жорны рэпрэсій. Варта адзначыць, што пераслед сем'яў і груп сваякоў набывае ўсё больш разнастайныя формы: групавыя працэсы, расцягнутыя ў часе судовыя разборы, пераслед сваякоў праз публічнае адвакатаванне інтарэсаў іх блізкіх, што раней сталі ахвярамі рэпрэсій.
Самымі распаўсюджанымі па-ранейшаму застаюцца групавыя працэсы над цэлымі групамі сваякоў і сем'ямі паводле «народнага» 342 артыкула КК.
Цягам лютага зафіксаваны ўсплёск справаў, паводле якіх ахвяры рэпрэсій праходзілі ў другі і наступны разы. Такіх кейсаў зафіксавана не менш за 11. Гэта азначае, што з улікам, пакуль справа дайшла да канкрэтнага суда, цягам усяго перыяду электаральнай кампаніі, палітычныя зняволеныя спазналі неймаверны ціск у пенітэнцыярнай сістэме.
Напрыклад, амаль з дзясятак справаў абрынулася на пенсіянера Васіля Дземідовіча. Цягам лютага ён быў фігурантам справы аб абразе прадстаўніка ўлады ў судзе Смалявіцкага раёна. Раней мужчыну рэпрэсавалі ў Гродне, Дзяржынску, Драгічыне, Гомелі, Пухавічах, Нясвіжы і Старых Дарогах.
аз