У заяве, апублікаванай у ноч з чацвярга на пятніцу, лідары краін G7 запэўнілі ў сваёй поўнай падтрымцы спынення агню паміж Ізраілем і ХАМАС, заклікалі абодва бакі выконваць пагадненне і папярэдзілі ХАМАС і яго саюзныя групоўкі, каб яны стрымаліся ад далейшых нападаў на Ізраіль.
Лідары краін G7 — Канады, Францыі, Германіі, Італіі, Японіі, Вялікабрытаніі, ЗША і ЕС, як наднацыянальнай арганізацыі, — назвалі пагадненне «значным прагрэсам». Яны выказалі надзею, што гэта дапаможа забяспечыць вызваленне ўсіх астатніх закладнікаў, а таксама адкрые шлях для бесперашкоднай дастаўкі гуманітарнай дапамогі і вяртання перамешчаных грамадзянскіх асоб у свае дамы.
Лідары таксама падзякавалі Егіпту, Катару і ЗША за іх паспяховае пасярэдніцтва паміж Ізраілем і ХАМАС і заклікалі палесцінскі бок працягваць «канструктыўныя» перамовы аб наступных кроках пагаднення для дасягнення трывалага міру.
Лідары заклікалі ХАМАС і Ізраіль цалкам выконваць узгодненыя ўмовы пагаднення, у тым ліку дазволіць бяспечны, хуткі і бесперашкодны паток гуманітарнай дапамогі. Гэтая падтрымка вельмі важная, улічваючы тое, што становішча жыхароў сектара Газа «катастрафічнае» і працягвае пагаршацца. G7 таксама чакае, што абодва бакі будуць абараняць грамадзянскіх асоб, у тым ліку гуманітарных работнікаў, і паважаць міжнароднае гуманітарнае права. Была таксама падкрэслена неабходнасць прыняцця мер па аднаўленні сектара Газа, у якіх павінна ўдзельнічаць міжнародная супольнасць.
Лідары заявілі, што, нягледзячы на перамір'е, яны працягваюць асуджаць ХАМАС за напад на Ізраіль 7 кастрычніка 2023 года. Яны таксама перасцераглі саюзнікаў арганізацыі, у тым ліку Іран і арганізацыі, якія кантралююцца Тэгеранам, ад далейшых нападаў на Ізраіль. Лідары G7 запэўнілі ў сваёй «падтрымцы (забеспячэння) бяспекі Ізраілю перад тварам гэтых пагроз».
У заяве таксама нагадваецца, што краіны G7 будуць працягваць працаваць для дасягнення міру на Блізкім Усходзе і ажыццяўлення рашэння аб дзвюх дзяржавах, гэта значыць суіснавання незалежных Ізраіля і Палестыны.
У сераду Ізраіль і палесцінская тэрарыстычная арганізацыя ХАМАС дамовіліся аб спыненні агню і абмене закладнікамі і палоннымі. Пагадненне павінна ўступіць у сілу 19 студзеня, а яго выкананне будзе кантралявацца трыма краінамі-пасярэднікамі на перамовах, а менавіта Катарам, Егіптам і ЗША.
ав