Еўракамісія лічыць «Усходні шчыт» важным праектам для ўмацавання абароны Еўрасаюза. Пра гэта гаворыцца ў апублікаванай сёння Еўракамісіяй «Белай кнізе».
«Белая кніга» – гэта дакумент, які называе выклікі, якія стаяць перад Еўрасаюзам у галіне абароны і магчымыя спосабы падрыхтоўкі да розных сцэнароў.
У тым ліку, Еўракамісія падкрэслівае, што ЕС павінен, сярод іншага, узмацніць абарону сваёй знешняй мяжы, асабліва сухапутнай мяжы з Расіяй і Беларуссю ад ваенных і гібрыдных пагроз. У сваю чаргу, рэалізаваны некалькімі краінамі ЕС праект «Усходні шчыт», камісія палічыла праектам, які варта разгледзець, бо ён можа дапамагчы супрацьстаяць нарастаючым выклікам у рэгіёне.
Нагадваем, кошт рэалізацыі «Усходняга шчыта»ацэньваецца ў 2 мільярды еўра. Унясенне яго ў «Белую кнігу» не гарантуе еўрапейскага фінансавання, але адкрывае шлях да яго.
«Белая кніга» не вызначае канкрэтных флагманскіх праектаў; не называе канкрэтнага спісу. Гэтае пытанне вырашаць краіны-члены, у якіх цяпер ёсць шэсць месяцаў, каб падаць свае праекты на ацэнку Еўракамісіі.
Грошы для фінансавання агульных інвестыцый ЕС у абарону або для развіцця еўрапейскай узброенай прамысловасці будуць паступаць з крэдытнага фонду ў 150 мільярдаў еўра. Краіны члены змогуць атрымаць з яго танныя крэдыты на рэалізацыю сваіх праектаў. Гэта ключавы элемент плана павышэння боездольнасці Еўропы, падрабязнасці якога Еўракамісія прадставіла таксама сёння.
IAR/аз